Arddangos Arloesedd mewn Diagnosis Canser yn nigwyddiad MediWales Connects 2025

Cafodd atebion arloesol ar gyfer gwneud diagnosis canser yn fwy cyflym le amlwg yn nigwyddiad MediWales Connects 2025, pan fu dau gyflenwr arloesol Her Canser Canolfan Ragoriaeth SBRI yn trafod y cynnydd a wnaed yn eu prosiectau peilot.

Clywodd mynychwyr y digwyddiad am waith Qure.ai a Cyted Health, oedd ill dau wedi eu dewis drwy gystadleuaeth her arloesi, i brofi a graddio technolegau newydd gyda’r nod o gyflymu diagnosis a rheolaeth canser yng Nghymru – gyda Cyted hefyd yn gweithio mewn partneriaeth â gwasanaethau yng Ngogledd Iwerddon.

  • Mae Qure.ai yn harneisio pŵer AI i gynorthwyo clinigwyr i ddehongli delweddau’r frest, er mwyn canfod canser yn gynt a blaenoriaethu achosion canser posibl yn well.
  • Mae Cyted Health, trwy eu platfform EndoSign a thechnoleg sbwng capsiwl, yn ehangu mynediad at ddulliau diagnostig nad ydynt yn fewnwthiol ar gyfer cyflyrau fel canser yr oesoffagws, gyda’r potensial i leihau rhestrau aros ar gyfer endosgopi a gwella canlyniadau cleifion.

Tynnodd y sesiwn sylw at yr hyn sydd eisoes wedi’i ganfod o brofion mewn sefyllfaoedd go iawn o fewn byrddau iechyd Cymru, gyda chefnogaeth timau clinigol, arweinwyr digidol, a rheolwyr arloesi ar draws y GIG.

“Nid technoleg newydd yn unig a gyflwynwyd yn MediWales Connects, ond gwelwyd hefyd, mewn ffordd bwerus iawn, y rheswm pam rydyn ni’n gwneud hyn,” meddai Faye Williams, Rheolwr Prosiect Her Canser. “Dangosodd Qure.ai a Cyted botensial yr offer hyn i wneud gwahaniaeth gwirioneddol; i gael diagnosis canser yn gynt, i leihau’r angen am weithredoedd mewnwthiol, a helpu pobl i gael y gofal sydd ei angen arnynt yn gynt. Dyna sydd wrth wraidd yr her hon – hybu arloesedd sy’n rhoi budd gwirioneddol i gleifion, clinigwyr, a’r GIG ehangach.”

Daeth MediWales Connects â chlinigwyr, arweinwyr polisi a diwydiant ynghyd am ddiwrnod o ddysgu a thrafod ar y cyd. Dangosodd y digwyddiad sut y gall cyllid ar gyfer arloesedd sydd wedi’i dargedu, fel Her Canser SBRI, sydd yn cael ei gyflwyno mewn partneriaeth â thîm Iechyd SBRI Gogledd Iwerddon, gyflymu’r broses o ganfod atebion sy’n cynnig cyfle i gael effaith wirioneddol ar gleifion ac i’r GIG.

Bydd Qure.ai a Cyted ill dau yn parhau â’u cynlluniau peilot, a bydd y canfyddiadau yn llywio modelau gwasanaeth a phenderfyniadau comisiynu mewn llwybrau canser ledled Cymru a Gogledd Iwerddon yn y dyfodol.

Cofrestrwch i’n rhwydwaith cydweithio

I gadw’n gyfredol gyda chyfleoedd cyllido, digwyddiadau a gweithio ochr yn ochr â phobl tebyg sydd â phasiwn go iawn am arloesi a gwella iechyd, cofrestrwch yma:

&